Bakı şəhəri, Nəsimi rayonu ərazisində yerləşən və "3-cü mikrorayon bazarı” kimi tanınan ərazidə baş  verən yanğından zərər çəkmiş şəxslər obyektdə ehtiyat su anbarlarının olmadığını iddia ediblər.

Cebhe.info-ya açıqlamasında "Azərsu" Açıq Səhmdar Cəmiyyətinin mətbuat xidmətinin rəhbəri Anar Cəbrayıllı deyib ki, "Azərsu” tikinti şirkətləri qarşısında yeni tikilən binalarda su anbarlarının tikilməsi məsələsini məcburi tələb kimi qoyur:

"Bütün hündürmərtəbəli binalarda, ticarət mərkəzlərinin hər birində ehtiyat su anbarları olmalıdır. Bu anbarlar həm içməli su ehtiyatının təminatına, həm də yanğından mühafizəyə xidmətinə hesablanmalıdır. Yəni su anbarların tikilməsində hər iki xidmətin təminatı nəzərə alınmalıdır. Bu gün Bakıdakı bütün hündürmərtəbəli binaların ehtiyat su anbarları var. Bu binaların su təchizatına "Azərsu” cavabdehdir.

Amma "3-cü mikrorayon bazarı” sovet dövründən qalma bazar olduğu üçün yəqin ki, orada su anbarı tikilməyib. Amma yeni tikilən binalara biz məcburi tələb qoyuruq ki, mütləq su anbarları tikilməlidir. Köhnə tikililərdə ehtiyat su anbarları olmasa da, məhəllələrdə su anbarları var”.

Anar Cəbrayıllı "EuroHome”da ehtiyat suyun olmaması iddiasına da münasibət bildirib:

""EuroHome”da yanğın baş verən gün "Azərsu”-nun şəbəkəsində normal təzyiqli su olub. Əgər sahibkar anbarına su yığmayıbsa, ona "Azərsu” cavabdeh deyil. Yəni ehtiyat su anbarının hər bir öhdəliklərinə sahibkarlar cavabdehdir. Su anbarlarına suyun yığılması, anbarın təmizlənməsi, oradakı nasosxanaların işlək vəziyyətdə olması və sair kimi məsələlərə sahibkar cavabdehdir”.

Əli Bədir