İraqda Mosul şəhərinin terrorçulardan azad edilməsi üzrə əməliyyat başlanıb. Bu barədə məlumatı İraqın baş naziri Heydər əl-Abadi verib. Baş nazir qələbənin yaxın olduğuna inandığının vurğulayıb:İki illik mübarizəmiz sona çatır. Qələbə yaxındadır! Bu ölkəmizin,İraq xalqının böyük qələbəsi olacaq”. İraqın sayca ikinci ən iri şəhəri olan Mosul 2014-cü ilin iyunundan etibarən İŞİD silahlılarının nəzarəti altındadır. İraq və ABŞ hərbi qüvvələri İŞİD-in nəzarətində olan Mosul şəhərinə artilleriya zərbələri endirməyə başlayıb. Əraziyə beynəlxalq koalisiyaya məxsus aviasiya cəlb olunub. İraq Hərbi Hava Qüvvələri Mosula hücumla bağlı sakinləri xəbərdar etmək üçün şəhərə minlərlə vərəqə atıb. Mosul sakinlərindən evlərini tərk etməmək, İŞİD terror təşkilatının mövqelərinə yaxınlaşmamaq tövsiyə edilib. İŞİD-ə qarşı quru əməliyyatda 60 min hərbçinin iştirakı nəzərdə tutulub.
