Kamil Səlimov: "Zəhərli maddələrin hamısı qeydiyyatdadır”
Terrorçular Fransa ərazisindəki dəmiryol stansiyalarını partlatmaq və qidaları zəhərləmək yolu ilə terror hücumları həyata keçirə bilərlər. Cebhe.info xəbər verir ki, bu barədə Fransa mediası məlumat yayıb.
"Le Parisien" qəzetinin yazdığına görə, ölkə ərazisində mümkün terror hücumları barədə yeddi səhifəlik məxfi məlumat əldə edilib. Həmin məlumat sentyabrın əvvəlində polis orqanlarının əlinə keçib. Sənədlərdə terrorçu təşkilatların son üç aydakı fəaliyyət üslubları şərh olunur. Qeyd edilir ki, terrorçular partlayıcı qurğular hazırlayaraq təkbaşına fəaliyyət göstərmək taktikasından istifadə edə bilərlər. Onlar bu yolla qatarları relsdən çıxartmaq, meşə yanğınları törətmək, hətta kütləvi istifadə olunan qidaları zəhərləmək yollarından istifadə etməyi planlaşdırırlar.
Sənədlərdə qeyd olunan məlumatlarla bağlı əhaliyə diqqətli olmaq, şübhəli şəxs və ya subyektlərlə bağlı polisə vaxtında məlumat vermək tövsiyə olunub.
Bu fakt beynəlxalq terrorçu şəbəkənin öz taktikasını dəyişdiyindən xəbər verir. Daha çox odlu silahlardan və partlayıcı qurğulardan istifadə edən terrorçular son dövrlər yeni üsullara əl atır. Almaniya, Fransa, Belçika, İsveç, Böyük Britaniyada baş verən kütləvi qətllər zamanı terrorçular əsasən yük maşınlarını insanların üzərinə sürmək və bıçaqla öldürücü yaralamaq üsulundan istifadə edib.
Fransa mediasının yaydığı xəbərdən isə terrorçuların daha təhlükəli cinayət planları üzərində düşündüyünü görmək olar. Kütləvi zəhərlənmə riski dünya ölkələrində ərzaq təhlükəsizliyi problemi ilə daha ciddi məşğul olmaq məsələsini gündəmə gətirəcək.
Çünki zəhərlənməyə terror təşkilatlarının hədəfi olan ölkələrlə yanaşı, həm də xaricdən ərzaq məhsulları idxal edən dövlətlərin də əhalisi məruz qala bilər. Azərbaycanın idxalçı ölkə olduğunu nəzərə alsaq, qida təhlükəsizliyi məsələsinin artıq milli təhlükəsizlik səviyyəsinə qalxdığını söyləmək olar. Onu da qeyd edək ki, ermənilər Azərbaycana qarşı belə üsullardaN istifadə ediblər. Bu yaxınlarda Araz çayının ermənilər tərəfindən bilərəkdən zəhərlənməsi nəticəsində sudakı canlılar kütləvi tələf olmuşdu. Yaxud minaların və içərisinə partlayıcı yerləşdirilmiş oyuncağın çayla Azərbaycan yaşayış məntəqələrinə axıdılması metodundan istifadə edilib.
Sözügedən informasiyanı Cebhe.info-ya şərh edən Bakı Dövlət Universitetinin Hüquq fakültəsinin Kriminalistika kafedrasının müdiri, professor Kamil Səlimov hesab edir ki, dəmiryolu relslərinin partladılması, qatar qəzalarının törədilməsi, insanların kütləvi zəhərlənməsi bütün müharibələrdə və terror təşkilatlarının əməliyyatlarında istifadə edilən üsullardır: "Sadəcə olaraq, terrorçu qruplaşmaların bu məqsədə nə qədər çatması onların mütəxəssis və maliyyəsinin olub-olmamasından asılıdır. Terrorçular kütləvi qırğın törətmək üçün kimyəvi silahdan da istifadə edir, insanları da zəhərləyir. Xocalıda necə etdilər? Sarkisyanın başçılıq etdiyi dəstələr dinc əhalini top atəşinə tutdular ki, Azərbaycan xalqında qorxu yaransın, öz torpaqlarını tərk etsin, Dağlıq Qarabağdan imtina etsin.
Ona görə də bizə qarşı hər cür terror üsulundan istifadə oluna bilər. Xüsusi xidmət orqanları təhlil aparanda bütün elementləri araşdırırlar. Burada birinci yerdə insan amili dayanır, sonra təşkilat. Bütün kimyəvi, bioloji, zəhərli maddələr hamısı xüsusi qeydiyyatdadır. Onlar hər bir dövlətin ərazisində xüsusi rejimdə qorunur. Onun da eyniləşdirilməsi aparılır. Sabah hər hansı zəhərlənmə faktı baş versə, xüsusi xidmət orqanları onun hansı laboratoriyada istehsal olunduğunu və Azərbaycana necə gəlib çıxdığını müəyyən edə bilərlər. Bunun üçün xüsusi xidmət orqanlarının öz məxfi metodları var. Azərbaycan ərazisinə daxil olan bütün qidalar Gömrük Komitəsi, həm də Dövlət Təhlükəsizlik Xidməti tərəfindən nəzarətə götürülür, laboratoriya yoxlaması aparılır”.
Müşfiq Abdulla