Yuxarı

Yol polisinin ləğvi gündəmdə

Yol polisinin ləğvi gündəmdə

“Özüm də dəfələrlə avtomobil idarə edən zaman yol polisinin reket və qanundankənar, oğru və hiyləgər davranışlarının çox şahidi olmuşam. Rüşvət almalarına, şantaj etmələrinə, qanunu bilməyənlərin məlumatsızlığından istifadə edib, sürücülərin başına “torba hörmələrinə” də şahidlik etmişəm. Onu da bilirik ki, yol polisi işə çıxanda "çörək pulu çıxarmaq" düşüncəsi ilə çıxır. Yəni yolu tənzimləmək yox, qayda pozuntularına imkan yaratmaq, pusquda durub güdmək, bilməyərəkdən qanun pozan sürücünün qanun pozmasının qarşısını almaq əvəzinə, durub gözləmək və anında qırğı kimi başının üstünü kəsdirmək. Budurmu qanun? Ya dövlət başçısına yalan məlumat verilir, ya da dövlət başçısı da tədbir görə bilmir”.

Cebhe.info xəbər verir ki, bu sözləri Azərbaycan Xalq Cəbhəsi Partiyasının (AXCP) sədri Razi Nurullayev deyib.

“Ya dövlət başçısına yalan məlumat verilir, ya da dövlət başçısı da tədbir görə bilmir”

AXCP sədri qeyd edib ki, prezidentin sərt reaksiyası belə bu qanunsuzluqların qarşısını ala bilmir:

“Dövlət başçısı yol polisinin qanunsuz hərəkətləri ilə bağlı bir neçə dəfə sərt danışıb. Yol polisinin yazdığı cərimənin 25 faizini onların əmək haqlarına əlavə edilməsi barədə qanuna dəyişiklik və ya əlavələr edilib. Yol polisinin əmək haqları orta azərbaycanlının əmək haqqından bir neçə dəfə çoxdur. Amma, yenə də rüşvətxorluq, qanunsuzluq, oğurluq və reketçilik davam edir.

Məsələnin iki tərəfi var. Ya dövlət başçısına yalan məlumat verilir, ya da dövlət başçısı da tədbir görə bilmir. Hər ikisi faciədir. Hər bir ailədə bir neçə nəfər sürücü var, demək yol polisi hər bir ailəni incidir, dövlətdən narazı salır. Əgər prezident İlham Əliyev vətəndaşların, hər bir azərbaycanlı ailənin qeydinə qalmaq, onları yol polisinin zorakalığı və qanunsuz hərəkətlərindən qorumaq istəyirsə, yol polis sistemi ləğv edilməli, yerində Respublika Yol Hərəkətinə Nəzarət İdarəsi yaradılmalıdır. Bu idarənin işi yol hərəkətini tənzimləmək, yol mədəniyyətini formalaşdırmaq, sürücüləri mədəni və uyğun tədbirlərlə tərbiyələndirmək olmalıdır.

Bəli, dərhal yol polisi sistemi prezident fərmanı ilə tarixə qovuşmalı, yerində Respublika Yol Nəzarəti İdarəsi yaradılmalıdır. Prezident bunu xalq üçün, vətəndaş üçün, sürücüləri yol polis sisteminin oturuşmuş qanunsuzluq məngənəsindən xilas etmək üçün etməlidir.

Mən Azərbaycan Xalq Cəbhəsi Partiyasının sədri kimi Prezident İlham Əliyevə müraciət edirəm. Xahiş edirəm ki, bu təklifi nəzərə alsın və dərhal yoxlamaların başlaması, Gürcüstan və Ukrayna təcrübəsinin öyrənilməsi barədə göstəriş versin,-deyən AXCP sədri yol polisinin vəzifələri ilə bağlı vacib məqamlara diqqət çəkib:

“İndi isə, hər kəsin, o cümlədən Prezident İlham Əliyevin nəzərinə aşağıdakı məqamları çatdırmaq istəyirəm:Bağlantı

Yol polisi nə üçündür?

“Yol polisi yolu tənzimləməlidir və yol hərəkəti qaydalarına sürücülərin əməl etməsinə kömək etməlidir. Yol polisi kol dibində, görünməyən yol ayrıcı və əyrilərində gizlənə bilməz. Əksinə, o, elə yerdə dayanmalıdır ki, sürücü onu görüb, qanunu pozmasın. Radar gizlətmək üçün deyil, radar sistemi də ona görə qoyulur ki, sürücü görsün, bilsin və qaydanı pozmasın. Bir kilometr məsafədən də sürücüyə xəbərdarlıq edilir ki, radar var. Yol polisi də radar kimi işləməlidir, onun vəzifəsi sürücülərlə siçan-pişik oynamaq deyil. Yol polisi sürücünün arxasınca düşüb qəza vəziyyəti yaradırsa, bu, cinayət kimi bir əməldir. Yol polisi, cənab Prezident, yolda sürücülərin daha təhlükəsiz və rahat getməsi üçün çalışmalıdır. Azərbaycanın yol polisinin isə birinci vəzifəsi cəza tədbirləri görməkdir. Belə çıxır ki, Yol Polisi İdarəsi də düzgün ad deyil, adı Yol Cəza Xidməti olarsa, görünür daha məqbul olar.

Yol polisinin davranışı

Cənab Prezident, yolda qəza baş verərkən inanın ki, ölüm yoxdursa, yol polisinin birinci sualı və ya cümləsi belə olur: "Sənədləri verin" . Bu lənətlənmiş sürücülük vəsiqəsi, texniki pasport bu qədər önəmlidirmi? Yol polisi görən sürücü həyəcanlanır, qorxur, narahat olur, əsəbiləşir və bütün borc və xərclərini xatırlayır. Yol polisi sanki Əzraildir, can almağa gəlib. O, axı sürücüyə yardım etməyi, ona təsəlli verməyi bilməlidir. Qəzaya uğramış, xərcə düşmüş, sağlamlığını itirmiş, əmlakına ziyan dəymiş bir sürücüyə təsəlli və ilk yardım lazımdır. Amma zərərçəkən sürücülər nə edir? Tez maşını yoldan çıxarıb gizlətməyə çalışırlar, sınmış qol-qıçlarını unudurlar. Çünki, maşını düzəltmək, sağlamlığı düzəltmək bir xərc, üstəgəl yol polisinin və hadisə yerinə gələn müstəntiqin alacağı rüşvətlər, qapılarda saatlarla gözləmələr, əsəb gərginliyi və s.bir dərd.

Cənab Prezident, budurmu vətəndaşa xidmət, hüquq bərabərliyi, hüququ dövlət?

Evakuator

Maşınların evakuatorla aparılması praktikası çox yanlışdır. Birincisi, kimsə gəlib maşının üzərində yazılıb qoyulan cəriməni görərsə, bir də orada saxlamaz. Amma nə baş verir? Maşın cərimə meydançasına aparılır, sürücü şəhəri ələk-vələk edib maşınını axtarır, tapır, cərimədən iki dəfə artıq kiminsə cibinə ödəyir və hökuməti söyə-söyə geri qayıdır. Maşınların evakuatorla aparılması rüşvət mənbəyidir, cənab Prezident! Dayandırın bu qanunsuzluqları,xalq və millət üçün, vətəndaş üçün!

Sürücülük vəsiqələri

Razi Nurullayev hesab edir ki, rüşvət vermədən sürücülük vəsiqəsi alan çox az adam tapılar: “İmtahandan keçənlər var, amma onlar da sürmə imtahanında rüşvət verməli olublar. Azərbaycanda yol mədəniyyəti çox aşağıdır, cənab Prezident! Siz də bunu bilirsiniz, amma görülən tədbirlər kafidirmi? Xeyr. Çünki rüşvətlə sürücülük vəsiqəsinin paylanması davam edir. Bunun qarşısı alınmayınca, kor və nadan sürücülərin sayı artacaq.

Təklif edirəm ki, Yol Polis Sistemi ləğv edilsin, sürücülük vəsiqələrinin verilməsi isə ASAN Xidmətə tapşırılsın. İmtahanların verilməsi isə Dövlət İmtahan Agentliyinə həvalə edilsin. Əlavə olaraq, təklif edirəm ki, yaş hədlərinə bölünərək, sürücülük vəsiqələri almış şəxslər yenidən imtahan versinlər. Yol mədəniyyətsizliyinin qarşısının alınması və qayda-qanunların yaradılması mexanizmlərindən biri də budur. Kütləvi yox, yaş hədlərinə uyğun olaraq imtahanlar təyin edilsin və proses 10 il ərzində başa çatdırılsın.

Cənab Prezident, sizə müraciət edir və xahiş edirəm ki, sürücülük vəsiqələrinin verilməsi ilə bağlı dərhal sərəncam imzalayasınız.

Razi Nurullayev sonda ümidvar olduğunu bildirib ki, verdiyi təkliflər və qaldırdığı problemlər ciddi nəzarətə götürüləcək və xalq tezliklə nəticəsini görəcəkdir.





Həftənin ən çox oxunanları