Ermənistanın xarici işlər naziri Edvard Nalbandyan Dağlıq Qarabağ ətrafındakı rayonların Azərbaycana qaytarılması məsləsinin müzakirə olunduğunu deyib. Ermənistan mediasının məlumatına görə, danışıqlar masasında 5 və ya 7 rayonun qaytarılması müqabilində Dağlıq Qarabağın ətrafında təhlükəsizlik zolağının yaradılması təklifi yer alır.
Cebhe.info Rusiya mediasına istinadən bu məsələ ilə bağlı yeni informasiya əldə edib. "Gazeta.ru”nun Ermənistan XİN-dən aldığı məlumata görə, söhbət hələlik yalnız bir rayonun qaytarılmasından gedir. Belə ki, Ermənistan "Madrid prinsipləri”nə uyğun olaraq, Ağdam rayonundan qoşunlarını çıxartmağa razılıq verə bilər.
Məsələni şərh edən rusiyalı politoloq Zurab Kanançev rəsmi İrəvanın bu mövqeyini "2016-cı ildə baş vermiş aprel döyüşlərinin nəticəsi” adlandırıb. "Ən pis sülh də ən yaxşı müharibədən yaxşıdır” deyən Cənubi Qafqaz və Mərkəzi Asiya üzrə ekspert bildirib ki, Ermənistanın millətçi müxalifəti ərazilərin güzəştə gedilməsini qəbul etmir. "Bu bəyanat ola bilsin ki, Sarkisyan hakimiyyəti ilə razılaşdırılıb və adi şəkildə ortaya atılmayıb. Belə söhbətlər Ermənistanın özündə daxili siyasi vəziyyəti gərginləşdirə bilər”,- deyə politoloq qeyd edib.
Müşfiq Abdulla
