Elxan Şahinoğlu:"Lavrov Doroxindən narazı idi”
Rusiya Federasiyasının Azərbaycandakı fövqəladə və səlahiyyətli səfiri Vladimir Doroxin prezident Vladimir Putinin sərəncamı ilə vəzifəsindən azad edilib. 2009-cu ildən Bakıda səfir kimi fəaliyyət göstərən V.Doroxin Azərbaycanı yaxşı tanıyan diplomat hesab olunurdu. Səlahiyyət müddəti xeyli müddətdir başa çatsa da, Moskva Doroxini geri çağırmağa tələsmirdi. Ona görə də səfirin gözlənilmədən vəzifəsindən azad edilməsi siyasi rezonansa səbəb olub. Bu, ilk növbədə, adi rotasiya qaydasında həyata keçirilən bir missiya da ola bilər.
Ancaq əldə olunan son məlumatlar V.Doroxinin təsadüfən geri çağırılmadığını göstərir.
Qeyd edək ki, artıq Rusiya prezidenti Azərbaycana yeni səfir də təyin edib. Həmin şəxs Rusiya Xarici İşlər Nazirliyində Kadrlar İdarəsinin rəis müavini işləyən Yuri Zuyevdir.
Sözügedən məsələni Cebhe.info-ya şərh edən "Atlas” Araşdırmalar Mərkəzinin rəhbəri Elxan Şahinoğlunun açıqlamasına görə, rəsmi Moskva V.Doroxinin fəaliyyətindən razı qalmadığı üçün onu başqası ilə əvəzləməyi qərara alıb. Kremlə hazırda Rusiyanın Cənubi Qafqaz və Azərbaycanla bağlı yeni siyasətini həyata keçirə bilən bir diplomat lazımdır:
"Məndə olan məlumata görə, Moskvada Doroxinlə bağlı son vaxtlar narazılıqlar yaranmışdı. Doroxin öz fəaliyyəti ilə Azərbaycan hakimiyyətinin maraqlarına problem yaratmırdı. Rəsmi Bakının maraqlarına tam uyğun fəaliyyət göstərən bir səfir idi. İyul ayında bu məsələ təsdiq olunub və məndə olan məlumata görə, xarici işlər naziri Sergey Lavrov sonuncu dəfə Bakıda olanda bu məsələni qaldırıb. Yeni təyin olunan Georgi Zuyevin Dağlıq Qarabağ problemi ilə bağlı mövqeyinin nədən ibarət olması barədə məlumat yoxdur. Vladimir Doroxin isə uzun müddətdir ki, Azərbaycanda səfir kimi işləyirdi və peşəkar diplomat idi. Onun səlahiyyət müddəti də çoxdan bitmişdi. Ola bilsin ki, Lavrovun Doroxindən narazılığı onun geri çağırılmasında rol oynayıb. Fikrimcə, Rusiyanın xarici siyasətində müəyyən korrektələr var və Doroxin bu yeni kursa uyğun gəlmir. Bütün hallarda o, kifayət qədər işlədi və geri çağırılmasının vaxtı idi”.
Müşfiq Abdulla