Sabit
Bağırov: "Banklarda biznes planını
qiymətləndirə bilən mütəxəssislər yoxdur”
Azərbaycanda
şirkətlər istehsal fəaliyyətinin artmasına ən
çox hansı amillərin mane olduğunu bildiriblər. Belə ki, Azərbaycan Sahibkarlar
Konfederasiyanın (ASK) apardığı sorğu zamanı "Şirkətinizin
istehsal fəaliyyətinin artmasını ən çox hansı amil məhdudlaşdırır” - sualına
sahibkarların 43 faizi maliyyəyə çıxışın
çətin olduğunu bildiriblər. 14 faiz
xammala çıxışın, 8 faiz kadrların çatışmazlığını, 4 faizi isə
qanunları göstərib. Sahibkarların 31 faizi bu suala "bilmirəm” cavabını verib.
Həmçinin
"Şirkətinizin gələcək 12 ay ərzində gəlirlərinin artacağını
gözləyirsinizmi” sualına
sahibkarların 59 faizi "mümkündür” cavabını verib. 11 faizi "çox ehtimal ki”, 10 faizi "bilmirəm”,
2 faizi "ehtimal yoxdur”, 18 faizi "ehtimalı
azdır” cavabını verib. Maraqlıdır,
sahibkarların maliyyəyə çıxış imkanlarını necə
əlçatan etmək olar?
Sahibkarlığa və Bazar İqtisadiyyatının İnkişafına Yardım Fondunun prezidenti Sabit Bağırov "Cümhuriyət” qəzetinə açıqlamasında bildirib ki, burada həm sahibkarlarla, həm də bankların bugünkü şərtləri ilə əlaqəli problemlər var: "Bəllidir ki, bankların kifayət qədər kredit resursu var. Yəni onlar biznes krediti verə bilərlər. Sahibkarların əsas çətinliyi zəmanətlə bağlıdır. İpoteka və Kredit Zəmanət Fondu yaradılıb, amma hələ də arzuolunan səviyyədə işləmir. Faiz dərəcələri və digər şərtlər sahibkarlar üçün ağır olaraq qalır. Sahibkarların zəif tərəfi bankların tələblərinə uyğun olaraq biznes planların hazırlanmamasından ibarətdir. Bir çox halda sənədlər tələb olunan səviyyədə hazırlanmır. Yəqin ki, sahibkarların bir çoxu müvafiq bacarığa malik deyil. Bu sahədə fəaliyyət göstərən konsaltinq şirkətlərinə isə müraciət etmirlər. Çünki bu, əlavə vəsait tələb edir”.
İqtisadçı
deyir ki, şirkətlərin maliyyəsini təmin etmək üçün yalnız bir mənbə yox, bir neçə mənbə olmalıdır: "İlk növbədə
digər investorların maliyyəsindən
istifadə məsələsi öz həllini tapmalıdır. Amma potensial
investorlar konkret sahibkarın biznes layihəsinə sərmayə
yatırmağa o vaxt razı olar ki, həmin
sahibkarın fəaliyyəti şəffaf olsun. Əsas şərtlərdən
biri həmin sahibkarın öz şirkətini idarə
etməsində korporativ idarəetmə prinsiplərinin tətbiq olunmasıdır. Ümumiyyətlə, bu gün mentalitet baxımından Azərbaycan sahibkarları şərikliyə
o qədər də maraqlı deyillər. Çalışırlar ki, ideyasını öz və ya digər maliyyə mənbəyi hesabına, amma digər sahibkarın
iştirakı ilə yox, məhz özü həyata keçirsin. Bu da Azərbaycan
sahibkarına xas olan bir təfəkkürdür.
Göründüyü kimi, burada bir çox həllini gözləyən problemlər var. Burada söhbət tək
iri sahibkarlardan getmir, onların kifayət
qədər səviyyəli biznes plan hazırlama bacarıqları var. İri
sahibkarların əsas problemləri əldə etmək istədikləri kreditlərin
yüksək faizli olmasıdır. Mikro, kiçik və
orta sahibkarların isə həm
müvafiq biznes planı hazırlamaq bacarığı problemi var, həm
iri sahibkarlardakı kimi kredit faizlərinin
yüksək olması problemi var, həm də zəmanət
problemi”.
Sabit Bağırovun qənaətincə, hazırda
Azərbaycanda fond birjaları kifayət
qədər inkişaf etməyib: "Fond birjalarının inkişaf etməsi
də şirkətlərin buna can atmasından asılıdır. Çünki fond
birjası nədir, hansı imkanları yaradır
şirkətlər üçün kifayət qədər anlaşılan deyil. Digər tərəfdən
şirkətlər fond birjasının siyahısına düşmək
üçün müəyyən tələblərə cavab verməlidir. İlk növbədə
şəffaflıq, korporativ idarəetmə kimi tələblərə
əməl olunmalıdır. Gördüyümüz kimi, maliyyəyə əlçatanlıqda həm şirkətlərin özlərinin həll edəcəkləri problemlər
var, həm də ümumi xarakter daşıyan ölkənin makroiqtisadi şərtləridir ki, onlar
banklara yüksək faizlə kreditlər təklif edir. Ümumən ölkənin makroiqtisadi
amilləri onları buna vadar edir”.
Fond
prezidenti hesab edir ki, banklar istehlak kreditləri ilə yanaşı, biznes
kreditləri verməkdə də maraqlıdır: "Məndə olan
məlumata görə, problem resursun olub-olmamasında
da deyil, kredit resursu var. Sadəcə olaraq, müəyyən səviyyədə biznes
planı hazırlanmalıdır. Doğrudur, biznes planların qiymətləndirilməsi
baxımından bankların özündə də müəyyən
problemlər var. Hələ ki, banklarda biznes planı
kifayət qədər qiymətləndirə bilən mütəxəssislər yoxdur. Ümid
edək ki, bir çox məsələlər yaxın zamanda öz həllini
tapacaq”.
Yeganə
Oqtayqızı