Akif Nəsirli:
"Ölkədə faiz dərəcələrini 10 faizdən aşağı sala bilərik”
Maliyyə
Bazarlarına Nəzarət Palatasının İdarə Heyətinin sədri vəzifəsini icra edən İbrahim Alışovun Azərbaycanda kredit faizləri ilə bağlı fikirləri cəmiyyətdə, sosial şəbəkələrdə rezonans doğurub. Xatırladaq ki, Palata rəhbəri bildirib ki, hazırda ölkəmizin bank sektorundakı
faizlər qonşu ölkələrdən yüksək deyil. Onun sözlərinə görə,
hazırda yerli banklar istehlak kreditlərini
orta hesabla illik 23%-lə, biznes kreditlərini isə illik 8%-lə təklif edir:
Qeyd edək
ki,”Cümhuriyət” qəzetinin ötən saylarında qonşu ölkələrlə
Azərbaycandakı bank faizlərinin müqayisəsi aparılıb. Palata rəhbəri Azərbaycanda kredit faizlərinin
yüksək olmadığını desə də, məlum olur ki, onun
müqayisə etdiyi Rusiyada istehlak kreditləri 8-10, biznes kreditləri isə 9
faizdən verilir. Gürcüstanda 5 faizdən biznes, 9 faizdən isə istehlak kreditlərini
təklif edən banklar var. Qazaxıstanda da təklif
edilən kredit faizləri təqribən eynidir. Yerli mətbuatda gedən araşdırmalara
görə, qonşu ölkələr arasında Türkiyədə
kreditlər daha aşağı faizlərlə təklif olunur. Burada, hətta 0,99 faizli
istehllak krediti təklif edən banklar da var.
Azərbaycanda kredit faizləri Avropa ölkələri ilə müqayisə edilməyəcək dərəcədə yüksəkdir. Məsələn, Fransa, İspaniya və digər inkişaf etmiş ölkələrdə daxil olmaqla Avropada istehlak kreditləri təxminən 4-7 faiz, biznes kreditləri 2-5 faiz, ipoteka kreditləri isə 1-3 faiz arasında verilir. Xatırladaq ki, Azərbaycanda ən aşağı isteklak kreditləti müxtəlif şərtlər nəzərə alınmaqla 16 faizdən təklif olunur. Biznes kreditlərinə gəlincə, isə banklar ümumiyyətlə kreditin bu növünü verməyə üstünlük vermirlər ki, bu da ölkədə sahibkarlığın inkişafını ləngidən vacib amillərdən biridir. Bəs, Azərbaycanda kredit faizlərinin yüksək olmasının başlıca səbəbləri hansılardır? Niyə əhalinin rifah səviyyəsi nəzərə alınaraq, kredit faizlərinin əlçatanlığı təmin edilmir?
İqtisadçı
Akif Nəsirli "Cümhuriyət” qəzetinə açıqlamasına bildirib ki, Azərbaycanda kredit faizlərinin yüksək
olmasının səbəbləri çoxdur. Onun sözlərinə görə,
yüksək faizlər həm bankların beynəlxalq
səviyyədə ucuz maliyyə resurslarına çıxış imkanlarının məhdudlaşdırılması,
həm də hökumətin banklara donorluq etməməsinin nəticəsidir: "Banklar da məcburiyyət
qarşısında kredit portfelini əmanətlərin hesabına
formalaşdırır. Kredit portfelinin təqribən 70 faizi əmanətlər
hesabına formalaşır. Əmanətlər 9-12
faizlə götürülür, bunun üzərinə Mərkəzi Bankın
xidmət faizləri gəlir ki, bu da 3-6 faiz arasında dəyişir. Bankın özünün xidmət faizləri də gəldikdə, bu
19 faiz edir. Bankın müəyyən mənfəəti
də olmalıdır. Bu qayda ilə Azərbaycanda
kredit faizləri 20 faizdən yüksək olur”.
İqtisadçı
deyir ki, Azərbaycanda kredit faizlərinin aşağı salınması üçün bir
sıra tədbirlər həyata keçirilməlidir: "Azərbaycan neft ölkəsidir, ölkənin
valyuta ehtiyatlarının həcmi 50
milyard dollara çatıb. Bu vəsaitin müəyyən
hissəsini ölkə daxilində ucuz kreditlərin verilməsinə yönəltmək olar. Təkcə
xarici banklara qoyduğumuz vəsaitin
hesabına yəni 3-5 faizlə, yerli banklara kredit verilə bilər. Bu zaman kreditlərin
baza hissəsi 9-12 faizdən, 5-6 faizə düşə bilər. Yəni bunun hesabına bank kreditlərinin faizini 50-60 faiz aşağı
salmaq olar. Bundan başqa Mərkəzi Bank, Maliyyə Bazarlarına Nəzarət Palatası niyə
görə, kreditlərin rəsmiləşdirilməsi üçün 3-6 faiz xidmət haqqı almalıdır. İnkişaf etmiş ölkələrdə həmin xidmət haqqı 1 - ən yüksək halda 1,5 faiz olur. Xidmət haqlarının aşağı salınması ilə kredit faizlərini daha 5 faiz
aşağı salmaq olar. Əgər 6 faiz baza hissəsi, 2 faiz Mərkəzi Bankın xidmət haqqı,5 faiz də
yerli bankın mənfəəti olarsa, bu cəmi 12 faiz
edir. Yəni, Azərbaycan hökuməti olaraq, bizim marağımız
və siyasi iradəmiz olarsa, bu gün ölkədə faiz dərəcələrini 10 faizdən
aşağı sala bilərik. Nəyə görə Azərbaycan hökuməti neftdən gələn gəlirləri
xarici banklara 3-5 faizlə verə bilir, ölkənin kommersiya banklarına donurluq etmir. Hazırda bankların kredit portfelinin həcmi
bir neçə milyarddır, amma valyuta ehtiyatlarımız 50
milyarda yaxındır. Xalq olaraq, bizim haqqımızdır ki, həmin
valyutadan bəhrələnərək. Onsuz da həmin valyutanın
yerləşdirilməsindən Azərbaycan hökuməti rəsmən mənfəət
götürə bilmir”.
Xatirə Nəsirova