Yuxarı

Bayrağımız - Milli qürurumuz

Bayrağımız - Milli qürurumuz

9 noyabr Azərbaycan Respublikasının Dövlət Bayrağı günüdür. Bu gün Azərbaycan Respublikası üzərində dalğalanan müqəddəs Dövlət Bayrağımız- milli bayrağımız ilk dəfə 1918-ci il noyabrın 9-da Bakıda, Azərbaycan Xalq Cümhuriyyəti Nazirlər Şurasında qəbul edilib və qurumun  yerləşdiyi binanın üzərində qaldırılıb. Müstəqil Azərbaycanın dövlət bayrağındakı üç rəngin ifadə etdiyi və XX əsrin əvvəllərindəki milli istiqlal ideologiyamızın üç təməl prinsipini təşkil edən "Türkçülük, islamçılıq və müasirlik” düsturunun müəllifi görkəmli Azərbaycan mütəfəkkiri Əli bəy Hüseynzadədir. 

Azərbaycan Respublikasının dövlət bayrağından istifadə müstəqil Azərbaycan Respublikası Konstitusiyasının 23-cü və 75-ci maddələri, "Azərbaycan Respublikasnın Dövlət bayrağı haqqında” Azərbaycan Respublikasının Qanunu, eləcə də, həmin Qanunla təsdiq edilmiş "Azərbaycan Respublikasının Dövlət bayrağı haqqında Əsasnamə” əsasında tənzimlənir. 

Azərbaycan Respublikasının Dövlət bayrağının rəngli və sxematik təsviri adı çəkilən Qanun və Əsasnamə ilə təsdiq edilmişdir. Əsasnaməyə görə Azərbaycan Respublikasının Dövlət bayrağı eni və uzunluğu bərabər olan rəngli üç üfüqi zolaqdan ibarət düzbucaqlı parça şəklindədir: üst zolaq mavi rəngdə, orta zolaq qırmızı rəngdə, aşağı zolaq yaşıl rəngdədir. Bayrağın hər iki üzündə qırmızı zolağın ortasında ağ rəngli aypara və səkkizguşəli ulduz təsviri vardır. Bayrağın eninin uzununa nisbəti 1:2-dir. Ayparanın və səkkizguşəli ulduzun təsvirləri tərəflərinin nisbəti 3:4 olan düzbucaqlının içərisində yerləşir; düzbucaqlının diaqonalı bayrağın eninin 1/2-nə bərabərdir. Ayparanın təsviri konsentrik (eyni mərkəzli) olmayan iki dairənin hissələri şəklindədir; böyük dairənin diametri xarici düzbucaqlının eninə, kiçik dairənin diametri isə bayrağın eninin 1/4-nə bərabərdir. Kiçik dairənin mərkəzi bayrağın həndəsi mərkəzindən sol tərəfdə, bayrağın eninin 1/60-nə bərabər olan məsafədə yerləşir.

Səkkizguşəli ulduzun təsviri ayparadan sağda yerləşir, ulduzun xarici dairəsinin diametri bayrağın eninin 1/6-ni, daxili dairəsinin diametri isə 1/12-ni təşkil edir. Azərbaycan Respublikasının Dövlət bayrağı və onun təsviri, ölçülərindən asılı olmayaraq təsvirlərə həmişə dəqiq uyğun gəlməlidir. Prezident İlham Əliyev Azərbaycanda Dövlət Bayrağı Gününün elan edilməsi barədə sərəncam imzalayıb. Sərəncama əsasən, hər il 9 noyabr Azərbaycanda Dövlət Bayrağı Günü kimi qeyd edilir.  2009-cu ilin noyabr ayında Dövlət Bayrağı Günü ilə bağlı Əmək Məcəlləsinin 105-ci maddəsinə əlavə edilmiş əlavəyə əsasən, 9 noyabr Azərbaycanda Dövlət Bayrağı Günüdür və bu bayram ölkədə qeyri-iş günü olan bayramların siyahısına daxil edilib. 2010-cu ilin sentyabrın 1-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən Dövlət Bayrağı Meydanının - Bakı şəhərinin Bayıl sahəsində yerləşən memorial abidə-istirahət parkının təntənəli açılışı olub.

162 metr yüksəklikdə dalğalanan Azərbaycan bayrağı dünyanın ən yüksək bayrağıdır. İnşa olunmuş dayağın hündürlüyü 162 m, bünövrəsinin diametri 3,2 m, bünövrənin üst hissəsinin diametri 1,09 m-dir. Qurğunun ümumi kütləsi 220 tondur. Bayrağın eni 35 m, uzunluğu 70 m, ümumi sahəsi 2450 m2, kütləsi isə təqribən 350 kq-dır. Ginnes Dünya Rekordları Təşkilatı 2010-cu il mayın 29-da Azərbaycan Dövlət Bayrağı Dirəyinin dünyada ən hündür bayraq dirəyi olduğunu təsdiq edib. Meydanda qurulmuş Azərbaycan Respublikasının gerbi, dövlət himninin mətni və ölkəmizin xəritəsi qızıl suyuna salınmış bürüncdən hazırlanıb. Meydanda Dövlət Bayrağı Muzeyi də yaradılıb.

"Cümhuriyət” qəzetinə açıqlamasında Vətəndaş Həmrəyliyi Partiyasının (VHP) sədri, Xalq Hərəkatının liderlərindən biri Sabir Rüstəmxanlı Milli Azadlıq Hərəkatı zamanı milli bayrağın ilk dəfə meydana gətirilməsindən danışıb:

"Bizim bayrağımız milli idealımızı əks etdirir. Yüz illərlə davam edən Azərbaycanı bir xalq kimi tarixin keşməkeşlərindən keçirən bir xətt, ruh var. O, ruh bizim türk olmağımızdır, daim həyatın ən yeni tələblərini görməyimiz, öz həyatımızı qurmağımızdır. İslam dəyərlərinə bağlılığımızdır. Bu üç xətt milləti millət edən xətdir. Bu üç xətti 1918-ci ildə birləşdirilib və bu bayraq ilk dəfə Azərbaycan Xalq Cümhuriyyətinin bayrağı olub. Xalq bunu unutmamışdı. Mühacirətə gedənlər də, Rəsulzadə xəttinin davamçıları da bu bayrağı yaşadırdılar.

1988-ci ildə yenidən bu bayraq ilk dəfə meydana gəldi. Həmin mitinqdə mən elan etdim ki, bu bayrağından başqa bütün bayraqlar meydandan yığışdırılsın. Demirəm ki, bu tək mənim xidmətimdir. Onu hazırlayanlar, meydana gətirənlər var idi. Amma biz onu meydanda səsləndirdik və bundan kütləviləşdi. 1991-ci ilin 18 oktyabrında da Müstəqillik Aktı qəbul olunandan sonra, bayraq Milli Məclisə gətirildi. Artıq bu bayrağı dünya tanıyır. Paytaxtda ən uca zirvədə dalğalanır. Bayrağa hörmət olmalıdır. Bayraq dövlətin və xalqın varlığının simvoludur”.

Vilayət Muxtar
Məcid Həsənli





Həftənin ən çox oxunanları