Kreml Azərbaycana xəbərdarlıq göndərdi
Arzu Nağıyev: "Azərbaycan hərbi əməliyyatlara başlasa, Rusiya müdaxilə edə bilməz”
Rusiyalı politoloq, Avrasiya İqtisadi Birliyi
layihəsinin müəllifi
kimi tanınan Aleksandr
Duqin Bakıya səfəri zamanı Azərbaycana sətiraltı təhdid edən açıqlama verib.
Ermənilərin qatı müdafiəçisi kimi tanınan A.Duqin
Dağlıq Qarabağ münaqişəsinin həllinə dair ikibaşlı fikir söyləyib:
"Status-kvo Rusiyaya əlverişlidir. Beynəlxalq ictimaiyyəti Qarabağı Azərbaycanın tərkib hissəsi olaraq tanıyır, lakin
kimsə Qarabağda
status-kvonu dəyişdirmək istəsə,
biz müharibəyə müdaxilə etməyə məcbur olacağıq, bu isə hamının itki verməsi deməkdir”, - deyə o
bildirib.
Kremlin ideoloqu Rusiyanın öz sülhməramlılarını
Qarabağa daxil etmək planının olmadığını
deyib. Lakin əlavə edib ki,
"lazım olacaqsa,
biz bunu edəcəyik”.
Aleksandr Duqin bir tərəfdən Dağlıq Qarabağın
Azərbaycanın ərazisi olduğunu desə də, digər tərəfdən,
status-kvonun dəyişməz olduğunu vurğulayır. Bununla Duqin həm Ermənistanın, həm də Rusiyanın mövqeyindən çıxış edir.
Çünki status-kvonun saxlanılması yalnız işğalçı tərəfin deyil, həm də onun dəstəkçisi
olan Rusiyanın maraqlarına
cavab verir. 2016-cı ilin aprel ayında baş verən "Dörd günlük müharibə” zamanı Azərbaycan ordusunun bir sıra əraziləri azad etməsi
status-kvonun dəyişməsi üçün əlverişli şərait yaratmışdı. Həmin vaxt münaqişə tərəfləri arasında atəşkəs haqqında sazişin
imzalanması Rusiyanın Cənubi Qafqazdakı dayaqlarını qoruyub saxlamağa
kömək etdi. Əks təqdirdə,
Azərbaycan ordusunun bir qədər də irəliləməsi bölgənin bütün geosiyasi mənzərəsinin
dəyişməsi ilə nəticələnə bilərdi. Ona görə də Kremlin qeyri-rəsmi sözçüsü kimi
tanınan A.Duqin
Rusiyanın müdaxilə edəcəyinə dair xəbərdarlıq etməklə Azərbaycanı hərbi əməliyyatlardan çəkindirməyə
çalışır.
Aleksandr Duqinin açıqlaması həm də Rusiyanın münaqişə ətrafında son
vaxtlar müşahidə olunan siyasi fəallığının tərkib hissəsi də sayıla bilər. Aprelin 28-də Azərbaycan və
Ermənistan xarici işlər nazirlərinin Moskvada keçirilən görüşü danışıqlar
prosesində Rusiyanın dominantlığını saxlamağa yönəlik növbəti addım idi. Eyni zamanda, müzakirələrdə münaqişənin sülh
yolu ilə həllinə dair 2016-cı ildə Vyanada və Sankt-Peterburqda qəbul edilmiş prinsiplərin
həyata keçirilməsi barədə razılığın əldə olunması faktiki olaraq, status-kvonun saxlanılmasına
xidmət edir. Moskva
görüşünün ardınca, A.Duqinin Azərbaycanı Rusiyanın adından təhdid etməsi rəsmi Bakını
razılaşmanın şərtlərindən kənara
çıxmamağı nəzərdə tutan xəbərdarlıq kimi başa
düşülə bilər.
Məsələni təhlil edən politoloq Arzu Nağıyevin sözlərinə görə, Duqinin açıqlaması daha çox subyektiv xarakter daşıyır və Rusiyanın mövqeyini əks etdirmir. Lakin ATƏT-in Minsk Qrupunun üzvü olan bir dövlətin siyasi eksperti tərəfindən belə fikrin səsləndirilməsi münaqişənin həllinə yalnız mənfi təsir göstərə bilər:
"Buna baxmayaraq, Aleksandr
Duqin müəyyən detallara əsaslanıb danışır. Əgər onun dediyi kimi olsaydı, Sergey
Lavrovun təşəbbüsü ilə Azərbaycan
və Ermənistan xarici işlər nazirlərinin görüşü təşkil olunmazdı. Çünki həmin
görüşlərdə söhbət danışıqların davam etdirilməsindən və status-kvonun ləğvindən gedir. Buna baxmayaraq,
Sarkisyan rejimi status-kvonun ləğvini istəmir. Duqinin müharibə anonsu verməsi həm də Ermənistanın Kollektiv Təhlükəsizlik Müqaviləsi Təşkilatının
üzvü olması ilə bağlıdır. Duqin bilir ki, Dağlıq Qarabağ BMT tərəfindən Azərbaycanın ərazisi kimi tanınıb. Azərbaycan işğal edilmiş ərazilərdə
istənilən vaxt anti-terror əməliyyatları aparmaq hüququna malikdir. Ona
görə də Duqin öz
mövqeyindən çıxış edir. Azərbaycan öz siyasətini
yürüdür və istənilən vaxt hərbi əməliyyatların keçirilməsi ilə bağlı mövqeyini
ortaya qoya bilər. Məlumdur ki, 2016-cı ilin aprel ayında Azərbaycan belə bir əməliyyat
keçirdi və Rusiya da müdaxilə edə bilmədi. Hətta Rusiyanın vassalı olan
Ermənistan ondan
müharibənin dayandırılması haqqında xahiş etdi. Azərbaycan indi də öz torpaqlarını azad etmək istiqamətində addımlar ata bilər. Sankt-Peterburq
görüşündən sonra Serj Sarkisyanı müəyyən addımlar atmağa sövq etmişdilər. Ermənistan Cənubi
Qafqazda öz nüfuzunu bərpa etmək üçün müəyyən addımlar atmalıdır ki, beynəlxalq layihələrə
qoşulsun. Rusiya təbii ki, müharibənin başlamasını istəmir. Ermənistanı Rusiyaya
yaxınlaşdıran əsas məqam NATO
üzvü olan Türkiyə ilə həmsərhəd olmasıdır. Əgər həmin sərhəddə sabitlik tam təmin
olunarsa, Ermənistan Rusiyaya lazım olmaz”.
Müşfiq Abdulla
